Расійскія інвестары накіравалі Мінфіну Беларусі апавяшчэнне пра дэфолт
23 студзеня, Позірк. Расійскія інвестары, якія валодаюць беларускімі еўрабондамі, накіравалі міністру фінансаў Беларусі Юрыю Селіверставу апавяшчэнне пра дэфолт, піша РБК.
Гаворка пра восем фізічных асоб і пяць кампаній, якія трымаюць каштоўныя паперы выпускаў Belarus 2023, Belarus 2026, Belarus 2027, Belarus 2030 і Belarus 2031 на суму 178 млн долараў.
“Дэфолт Рэспублікі Беларусь па пазначаных вышэй еўрааблігацыях стаў вынікам невыканання Саветам міністраў Рэспублікі Беларусь і Нацыянальным банкам Рэспублікі Беларусь сваіх абавязацельстваў па пагашэнні пазначаных вышэй еўрааблігацый і/або выплаце працэнтных купонаў па іх”, — гаворыцца ў апавяшчэнні.
Інвестары заклікалі ўрад і Нацбанк “выканаць свае абавязацельствы”, што, як яны мяркуюць, “дазволіць у далейшым захаваць цікавасць і давер да знешніх публічных запазычанняў Рэспублікі Беларусь”.
Паводле слоў прадстаўніка заяўнікаў — юрыста фірмы “Рыбалкін, Гарцунян, Дзякін і партнёры” Уладзіміра Пястрыкава, апавяшчэнне аб дэфолце “пададзена ў строгай адпаведнасці з нормамі права і эмісійнай дакументацыяй”.
Ён падкрэсліў, што сапраўднасць дэфолту “не залежыць ад згоды або нязгоды з ім” з боку Беларусі.
Калі канфліктная сітуацыя не вырашыцца, інвестары разглядаюць магчымасць звярнуцца ў Лонданскі міжнародны трацейскі суд (LCIA).
З 28 чэрвеня 2022 года Мінск пагашае даўгі па дзяржаўных каштоўных паперах, размешчаных на знешніх фінансавых рынках, беларускімі рублямі. Плацяжы пералічваюцца на спецрахунак у “Беларусбанку”, з якога плацежнаму агенту прапанавана самастойна забіраць сродкі і разлічвацца з інвестарамі. У такіх умовах кампаніі Citigroup і Citibank адмовіліся выступаць агентамі ў дачыненні да беларускіх еўрабондаў.
Неўзабаве пасля гэтага міжнародныя рэйтынгавыя агенцтвы Fitch Ratings і Moody’s панізілі крэдытны рэйтынг Беларусі: першае заявіла, што дэфолт у краіне непазбежны, другое назвала сітуацыю дэфолтам. Мінфін Беларусі раскрытыкаваў гэтыя рашэнні, але выплаты па валютных абавязацельствах у рублях працягнуліся.
Напрыканцы 2023 года Мінск выкарыстаў новую схему выплат расійскім інвестарам па еўрабондах — праз Нацыянальны разліковы дэпазітарый РФ, але ўсё гэтак жа ў беларускіх рублях.
Паводле інфармацыі РБК, выплаты па такой схеме закрануць толькі адзін выпуск аблігацый — Belarus-2023 — і толькі тых інвестараў, якія набылі адпаведныя каштоўныя паперы да 6 верасня 2022 года. Па астатніх выпусках Мінфін плануе выплачваць купоны па еўрабондах адначасова з іх пагашэннем, а “не па раней зацверджаным графіку”. Такім чынам, выплаты купонаў, напрыклад, па Belarus-2031 будуць ажыццёўлены толькі ў 2031 годзе. У якасці альтэрнатыўнага варыянту Мінфін прапанаваў інвестарам выкупіць аблігацыі за 30% ад наміналу або абмяняць іх на лакальныя паперы з падобнымі параметрамі.
Раней кіраўнік Цэнтра Мізэса Яраслаў Раманчук, каментуючы наяўную сітуацыю, адзначыў: інвестары, якія працуюць з аўтарытарным рэжымам, павінны быць гатовыя да рызык, што звязаныя з “абсалютным самавольствам і беззаконнем”.
Раманчук: Расійскія трымальнікі беларускіх аблігацый "не разумеюць, у якой абсурднай сітуацыі знаходзяцца"
18 кастрычніка, Позірк. Плануючы падаць іск на Міністэрства фінансаў Беларусі ў Лонданскі суд, расійскія трымальнікі беларускіх дзяржаблігацый "не разумеюць, у якой абсурднай сітуацыі яны знаходзяцца", заявіў у каментары "Позірку" кіраўнік Цэнтра Мізеса Яраслаў Раманчук. “Абсалютна ніякай пэрспэктывы ў гэтым няма. …