Паводле даных Дзяржпагранкамітэта, за мінулы тыдзень у Беларусь прыбылі 1.242 грамадзяніны Украіны

4 жніўня, Позірк. Паводле інфармацыі Дзяржаўнага пагранічнага камітэта, за мінулы тыдзень у Беларусь прыбылі 1.242 украінскія грамадзяніны (тыднем раней — 1.419).

Транзітам праз Польшчу ў краіну накіравалася 896 (1.025) чалавек, праз Літву — 321 (357), Латвію — 25 (37).

Усяго з 24 лютага 2022 года ў Беларусь з украінскай тэрыторыі прыбылі 110.397 грамадзян Украіны: праз украінска-беларускую мяжу — 15.890, транзітам праз Польшчу — 72.472, праз Літву — 17.961, праз Латвію — 4.074.

Ад пачатку 2023 года ў Беларусь уехалі 35.693 грамадзяніны Украіны: транзітам праз Польшчу — 25.967, Літву — 7.811, Латвію — 1.915.

10 ліпеня начальнік Дэпартамента па грамадзянстве і міграцыі Міністэрства ўнутраных спраў Аляксей Бягун заявіў, што больш за 2,3 тыс. асоб набылі беларускае грамадзянства за шэсць месяцаў 2023 года, большасць з іх — расіяне і ўкраінцы.

Паводле даных упраўлення вярхоўнага камісара ААН па справах бежанцаў на 18 ліпеня, па ўсім свеце зарэгістравана 6 млн 264 тыс. грамадзян, якія вымушана пакінулі Украіну, з якіх у Еўропе — 5 млн 911 тыс.

24 лютага 2022 года Расія пачала поўнамаштабную вайну супраць Украіны, у якой улады ў Мінску падтрымліваюць Крэмль.